ڕاگەیەندراوێک بۆ ڕای گشتی: ڕۆژهەڵات کارتی دەستی کەس نییە؛ چارەنووسی ئێمە تەنها بە ئیرادەی خۆمان دەنووسرێتەوە

ڕاگەیەندراوێک بۆ ڕای گشتی:

ڕۆژهەڵات کارتی دەستی کەس نییە؛ چارەنووسی ئێمە تەنها بە ئیرادەی خۆمان دەنووسرێتەوە

کۆمەڵانی خەڵکی تێکۆشەری ڕۆژهەڵاتی کوردستان!
ناوەندە سیاسی و دیپلۆماسییەکان!

قۆناغی مێژوویی ئێستای ڕۆژهەڵاتی کوردستان، دوای هەمو ئەو خرۆشانە نەتەوەییە  و قوربانییەکانی شۆڕشی ژن، ژیان، ئازادی، هۆشیارییەکی نوێی سیاسیی لە ناو جەماوەردا هێناوەتە ئاراوە. ئەم هۆشیارییە پێمان دەڵێت کە کاتی ئەوە هاتووە کۆتایی بەو قۆناغە بهێنرێت کە تێیدا دۆزی ڕەوای گەلی ئێمە وەک پاشکۆ یان کارتی فشار لە هاوکێشەی حزبیی پارچەکانی تری کوردستاندا بەکاربهێنرێت.
ئێمە لە بزووتنەوەی ئایندەی  کوردستان، بە توندی نەیارێتی خۆمان بەرامبەر بە هەر جۆرە هەژموونگەری، دەستێوەردان و سەپاندنی مۆدێلی فیکری و سیاسیی دەرەکی لە ژێر ناوی چەمکی تەمومژاوی وەک کۆمەڵگەی دیموکراتیک یان دروشمی سۆزداریی تر ڕادەگەیەنین. بارودۆخ، واقیع و ژینگەی سیاسی و کلتوریی ڕۆژهەڵاتی کوردستان تەواو جودایە لە پارچەکانی تر. بۆیە، پەسەند نییە هیچ هێز و پێکهاتەیەک لە دەرەوەی سنووری جوگرافیای ئێمە، یان بە پاشکۆیەتی بۆ ئەجێندای  هەرێمایەتی، بیەوێت ئاراستەی خەباتی ڕەسەنی خەڵکی ئێمە دیاری بکات.
هاوکات، لێرەوە ڕایدەگەیەنین کە هیچ حزب و لایەنێکی سیاسیی ڕۆژهەڵات بۆی نییە بە تەنیا و بەبێ گەڕانەوە بۆ ئیرادەی گشتیی گەل، بڕیار لەسەر چارەنووس، جۆری خەبات و هاوپەیمانییەکان بدات. ئەزموونی مێژوویی سەلماندوویەتی کە بڕیاری تاکڕەوانەی حزبی و سۆزداریی کوێرانە، تەنها پاشەکشە و خیانەتی مێژوویی بۆ دۆزەکەمان بەرهەم هێناوە و خوێنی گەنجانی ئێمەی کردووەتە قوربانیی بەرژەوەندیی مادی و دەسەڵاتداریی دەستەو تاقمەکان.
پەیامی ئێمە ڕوونە:
سەربەخۆیی بڕیاری سیاسی: بڕیاری کۆتایی لەسەر ئایندە و چارەنووسی ڕۆژهەڵاتی کوردستان تەنها و تەنها مافی ڕەوای گەلی ڕۆژهەڵات خۆیەتی.
ڕەتکردنەوەی پاشکۆیەتی: ئێمە پاشکۆی فیکری و سیاسیی هیچ لایەنێکی باکوور، باشوور یان ڕۆژاوا نین و ڕێگا نادەین خاکی زاگرۆس بکرێتە مەیدانی شەڕی بریکاریی هێزە دەرەکییەکان.
بەرەی یەکگرتووی نیشتمانی: داوا لە سەرجەم هێزە ڕەسەنەکانی ڕۆژهەڵات دەکەین کێشە ناوخۆییەکان و ململانێی حزبی وەلابنێن و لەسەر بنەمای بەرژەوەندیی باڵای ڕۆژهەڵات بەرەیەکی نیشتمانیی ڕاستەقینە بونیاد بنێین کە ڕێگا لە هەر جۆرە مامەڵەکردن و دەستێوەردانێک بگرێت.
کلیلی ڕزگاریی ئێمە لە گەڕانەوەدایە بۆ هێزی ڕەسەنی ناوخۆمان و زیندۆکردنەوەی ناسنامەی مێژوویی خۆمان. چیتر ڕێگا نادەین ئایندەی نەوەکانمان لە ژوورە تاریکەکانی سازشی دیپلۆماسیدا بکرێتە قوربانی.

ناوەندی بڕیار
 بزووتنەوەی ئایندەی  کوردستان
ئۆکتۆبەری  ٢٠٢٦